cap negro ، الراس الأسود ..بقلم آمنة جبالي

100
تونس ريفيو.. للمواطن صورة وصوت وقلم ||

قريبة من باراج سيدي البراق تخلي باجة وراك تفوت نفزة و تطل على بحر مش بعيدة على بنزرت .يعني تجمع بلايص الجمال الشمالي الصحيح . حاجة منجمو نحكمو عليها الا انها من العيار الثقيل، و علاش لا تولي وجهة سياحية هايلة.
خلينا نقولو اللي بلاصة هذه عبارة على جنة . هي اكا الغمضة اللي تاخوها و تحتار بين انك تتخيل و الا انت بلحق في بلاصة كيما هكا . اكا الاحساس متع تحب تملئ عينيك باللي داير بيك تشوف الخضار في كل بلاصة في حاجة فما تفاصيل تي حتى الاوراق الطايحين و بقطرات الماء مبلولين غلة مزيانة بين الاحمر و الأصفر .. الشمبينيون أنواع و اشكال . تحس بروحك تولدت من أول و الجديد اكا الطفل الصغير اللي يحب يمس كل شي و يتشعبط و يكتشف كل شي . بين زين غابات عين دراهم و بحر كاب فرينا تجينا كاپ ناڨرو حاجة من وراء الخيال . بعد ما تسحرنا بجمال الغابة و اللون الاخضر قينا رواحنا في بلاصة اخرى سبحان الله تقول سافرنا لبلاصة اخرى طريق طويل كي اللي نراوهم في بلدان البرى كلو طلوع و هبوط الصعدة تقول موجة تسونامي قد ما تعبنا فيها و جربنا مشينا حتى بالتوالي تفاجئنا برواحنا الفوق نراو في بحر و سماء و جبل و غابة مشهد من أقوى ما ريت في حياتي خلاتنا نقولو محلااااها تونس بلحق محلاها بصوت عالي . ايا وصلنا وين فما مركز حراسة تخيلو انتم بنية على الثالث طلعنا للسطح نشوفو في المنظر حتى جزيرة جالطة ريناها منغادي بلاصة تخليك تنسى التعب اللي تعبتو تنسى مشاكلك و انت اصلا شكون .. تتجرد من كل ماهو قيود و روتين و مسؤوليات تحس في لحظة اللي انت باني لروحك حبس و عاطي لمخك تصويرة غالطة على بلادك خاطر ربطتو بكل ماهو سلبي اش خلانا نقولو على اي بلاصة و الا حاجة مزيانة تقول مش في تونس اللاوعي متاعنا مينجمش يستوعب اللي احنا في تونس و اللي المشكلة فينا مش فيها و اللي عنا كل شي ناقصنا كان العقل و الخدمة.. قينا عمك الحبيب غادي يخدم عندو يجي 20 سنا يعس يمشي يجي 11 كلم كل يوم من دارو للغادي قعد يحكيلي كيفاه صغارو كبرو و تو في تونس قتلو اي باهية تو العاصمة قلي منجمهاش جوجمة انا نرتاح كان هنا بنيتي تونس كبيرة منجمهاش نڨعد نهار و نولي نحب نروح.. بلحق رغم اللي اكيد ضروفو صعيبة اما حسدتو في المنظر اللي يفيق عليه و يرقد عليه اصلا هو في راحة احنا هوما اللي نعيشو في الهامش و الهوا اللي يتنفس فيه احنا ظهرلي معاش فما اكسيجان عنا ولينا نتنفسو في الكربون و الكبريت التلوث و الستراس صورتلو فيديو خسارة متسجلتش بالصوت قتلو تو انت بلادنا باهية تنهد و قلي اي باهية تونس و قعد يعاود فيهاومتع واحد قلبو تكوى و تشوى من ظلمهم و همهم . تعرفو احساس كي تبدى عندك ولدك و الا بنتك متعبتك أما تقعد ديما تحبها و تحب تراها احسن حاجة أكاكة حبنا لبلادنا
مشية المرة هذي ثنيتها قد ما كانت مزيانة اما صعيبة مشينا في الطبعة طلعنا الصعادي تعبنا و تسد علينا النفس في وسط الثنية دقنا الشوك و هبطنا في حدرات بالحجر قلنا توبة و اخر مرة أما كي وصلنا و رينا الدنيا من فوق نسينا كل شي و كي وصلنا للكار ولينا نسألوا المشية الجاية وقتاه ..
الطبيعة هي اللي تسحرنا تعلمنا تربينا و أهم حاجة تقوينا
#خوذو_عيني_شوفو_بيها
#تونس_المزيانة

*بقلم أمنة جبالي




اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *