عملوها الخدامة في معمل الإلكترونيك سليانة.. المستحيل ليس تونسيا

665
تونس ريفيو.. للمواطن صورة وصوت وقلم ||

 

معمل الإلكترونيك في سليانة يحقق المرتبة الأولى عالميا في النجاعة بنسبة 97٪ من بين كل مصانع هذا المجمع حول العالم .

 

النجاعة هي القدرة على إحداث تأثير، و نقولو دواء ناجع يعني دواء شافي ، و نقولو موقف ناجع يعني موقف مفيد، ونقولو عمل ناجع يعني عمل عندو فايدة و أحدث التأثير و التغيير المطلوب منو.

 

إنجمو نقول تويكا بالفم و الملا إنو الخدام التونسي في سليانة أثبت قدرتو على إحداث التأثير في خدمتو و أثبت بالفعل موش بالكلام إنو ينجم يكون جدي و ملتزم و ينجم يبذل كل جهدو في الخدمة و يكون منظبط و خدام بالحق، وقت الي تتوفرلو الظروف، الي انجمو نتناقشو فيها.

 

ماحبيتش نبحث في الأسباب الي خلت الخدام في معمل الكترونيك سليانة باش تكون خدمتو ناجعة و مفيدة، الي يهمني إنو ثما خدامة توانسا أثبتو إنو التونسي موش ديما كركار و فاصع من الخدمة! بالعكس ينجم يكون خدام بالحق و يخدم بڨلب ورب و يعطي كل ماعندو في الخدمة و كل تونسي قادر على هذا.

 

موش مستحيل، تونس ترتقي و تتقدم بسواعد أولادها .
موش مستحيل، الخدام التونسي يولي يضرب بيه المثل في العالم في الانظباط.
موش مستحيل، الخدام التونسي يولي أحسن من الخدام الألماني و الياباني.
موش مستحيل، ماعادش تقول ما إنجموش .
دولة كيف سنغافورة قد جزيرة جربة قبل 50عام كانت أفقر من تونس تويكا من أقوى الإقتصادات في العالم.

 

 

تنجم تقلي خدامة يخلصو في شهرية باهية و cnss و بريمات و توفير ضروف مرتاحة في الخدمة الي هذا الكلو متوفر عند الموظف التونسي لكن أثبتت التجربة إنو الموظف التونسي من أكثر الموظفين الكركارة في العالم..

الفايدة في الڨلب صاحبي، ماهيش قضية شهرية!

أنا متأكد الي خدامة سليانة حسبو المعمل متاعهم و عرفو قيمة الجهد و التعب الي باش يعملوه تويكا و يرجع عليهم بالمنفعة من باعد..

 

أنا متأكد الي خدامة سليانة عندهم حلم كبير يخدمو عليه الحلم الي يشعل فيهم حرارة الروح باش يعطو كل جهدهم و طاقتهم في الخدمة..

أنا متأكد الي خدامة سليانة عندهم حلم كبير يخدمو عليه الحلم الي يشعل فيهم حرارة الروح باش يعطو كل جهدهم و طاقتهم في الخدمة..

 

أنا متأكد الي معمل الالكترونيك في سليانة يسيرو فيه قادة بعثو الإرادة و بعثو روح جديدة في الخدام، قادة بالحق موش مديرين يصححو على الأوراق و يفصعو بكري! القائد الحقيقي في مقدمة الخدامة و يخدم أكثر منهم و الأهم عندو رؤية و حلمة كبيرة باش يبني مصنع يكون الرقم 1 في العالم.

و هذا الي ترجموه الخدامة و كانو بالحق الرقم 1 بين بقية فروع المجمع الصناعي حول العالم و خطوة خطوة أتو يحكي بيهم العالم .

 

#بالتونسي بقلم:حسام طوبان



مراسل صحفي لتونس ريفيو بولاية أريانة و مدون و ناشط بالمجتمع المدني


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *