الرد الرسمي التونسي على الإمارات مزال بعيد على مبدأ حفظ السيادة و الكرامة

902
تونس ريفيو.. للمواطن صورة وصوت وقلم ||

 

من كثرة ما الدبلوماسية التونسية جبانة و رخيصة لين وقت ماتمنعت شركة طيران اماراتية من الهبوط في تونس، رديناها بطولة كبيرة !!

 

خلينا نشوفو آش صار بالضبط و كيفاش كان رد الفعل التونسي:

* الامارات تمنع السفر على النساء التونسيات و تاخذ قرارها وحدها حتى من غير ماتعلم السلط التونسية ..


* الرئيس يرد الفعل على الشريكة الاماراتية وقت الي القرار صادر عن السلطة الاماراتية موش شركة الطيران.


سعيدة قراش اليوم الصباح تخرج تبرر في القرار الاماراتي، بل أكثر من هكا تحكي وكأنها الناطق الرسمي بإسم الامارات وقت الي الامارات التو ماعطات حتى توضيح رسمي و شوف وشوف تخسرش علينا تغريدة في تويتر !


=> الأعذار الاماراتية ماتعنيناش اومورهم مشاكلهم. هوما الي مظطربين يبررو و يعتذرو و موش دور السياسي التونسي يوصل أعذار الامارات و يحكي بإسمهم.

 

 

” انتُظم صبيحة اليوم اجتماع بمقر وزارة النقل جمع ممثلين عن وزارة الخارجية ووزارة الداخلية وديوان الطيران المدني والمطارات وممثلين عن شركة الخطوط الإماراتية، وانتقل المجتمعون فيما بعد إلى مقر وزارة الشؤون الخارجية لمواصلة الإجتماع وإعلان القرار المشترك.” شمس آف آم


=> مسؤولين توانسا على أعلى مستوى يتشاورو مع الشركة الاماراتية،،
دوحي يا مباركة ! دولة الامارات مزبلت بينا القاعة و زيد تبعثلنا ممثل شركة طيران وقت الي القرار الاماراتي سياسي احنا في تونس يسخايلوها مشكلة تقنية تتعلق بالشركة .

 

 

وزير الخارجية التونسي اليوم يقول انو الاماراتيين اتصلو بيه و اعتذرو و هو يطالب بإعتذار علني !! و الي مافهمتوش يقول انو ابلغ الاماراتيين انو “تونس ماهيش تابعة الامارات ” ….


=> اذا وزير خارجية يوصل يقول لدولة اجنبية و ينبه فيها انو تونس ماهيش تابعتكم !!! يعني ثما أزمة دبلوماسية و اللعب حراش بينما وزير الخارجية مزال يطالب بإعتذار رسمي.

 


ماننسوش الشاهد حتى هو دخل على الخط و استقبل السفير الاماراتي. لكن لا الشاهد و لا السفير الاماراتي قالو حاجة بعد الاجتماع أو شنوة طلب الشاهد بإسم تونس.

 

 

## الرد الرسمي فضيحة و يثبت غياب الدبلوماسية التونسية ..
وقت الي الامارات تاخذ في قراراتها و موش معبرة و لا عاطية قيمة لحد أحنا دولتنا تكذب على روحها و تكذب على الشعب في تحويل الأزمة لمشكلة تقنية تتعلق بالشركة الاماراتية..


و لذا من غير مانكذبو على رواحنا و نصنعو بطولات من ورق لقرار تونسي رسمي ضعيف علخر .. انو تونس أول مرة عملت رد فعل مهما كان صغير فإنو لايكفي لرد الاعتبار لحجم الاذلال صار ! انو تعودنا بتونس الساكتة المطاطية راسها قدام الاجانب فإنو مايعنيش باش نرضو بموقف معاق يستغبى في التوانسا !!

 

 

>>> كمواطن تونسي يحترم نفسو و يحب يعمل لدولتو قيمة و قدر، تسألني اذا الي عملاتو تونس موش مكفيك امالا آش تحب ياسي المواطن ؟ ثما شكون قلي ” تحب نعلنو الحرب على الامارات؟” و واحد آخر ذكي قالي ” السياسة تدار بالواقعية” يقصد الانبطاح أما عمللها إسم مزيان .

 


أوك من الآخر :
الي يفهم في شوية سياسة يلزم يكون واضح عندو أن :

==> الرد الرسمي التونسي يلزم يتوجه مباشرة للسلطة الاماراتية و الا اسمو ضحك على الذقون .


==> المعاملة بالمثل تقتضي منع كل اماراتي من دخول تونس و الي يشدوه يصطاد في الحباري في الصحراء يعتقلوه موش يبعدوه من الصحراء كيف ماصار الاسبوع الفارط .


(هذا أضعف الإيمان لرد الإعتبار لكرامتنا)

 

 

#بالتونسي
بقلم : حسام طوبان



مراسل صحفي لتونس ريفيو بولاية أريانة و مدون و ناشط بالمجتمع المدني


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *