“الاعاقة موش في الجسد.. الاعاقة في الارادة”

270
تونس ريفيو.. للمواطن صورة وصوت وقلم ||

انا امر القاسمي عمري 16 سنة تولدت في المكناسي في سيدي بوزيد وتو نعيش في حمام الزريبة .
في 2002 تعرضت لمرض مجهول تسبب في بتر رجليا الزوز…بعد الحادثة هاذي وبالرغم من لوجيعة محبيتش نستسلم وحبيت نكمل حياتي ونثبت ذاتي ونعمل حاجات مايعملوهمش برشة ناس ..

بديت نتدرب على كل انواع الرقص العصري وبديت نعمل في الرسم والتزويق وبالشوية بالشوية بدات امكانياتي تطور ، بعد وليت نشارك مع اصحابي في عروض صغيرة للرقص العصري وبداو لعباد يهتموا بيا ولاو اعيطولي باش نشارك في تظاهرات اكبر وبعد استدعاوني باش نقدم عروض في  ألمانيا ونيويورك وهولاندا كيف كيف ما سلمتش في قرايتي وتو انا نقرا سنة ثانية ثانوي .
وبالاضافة للاشياء الي نعمل فيها وليت ندور على الجمعيات ونحاول نعاون الاطفال الي كيفي تعرضوا لحوادث باش اشقوا طريقهم. كيف كيف عندي قاعد نقرى في الاخراج وقاعد نحضر في مشروع 4 افلام قصيرة باش تكون فكرتهم مميزة.
ساقيا المبتورين موش ماثرين فيا وانا عايش حياتي طبيعية نحلم ونحب الفن ونحب نتطور ونحب ننجح في دراستي وفي خدمتي ..الاعاقة موش في الجسد… الاعاقة الحقيقة في الضمير وفي الارادة…وانا مدام القلب يدق الارادة ديما موجودة

 




اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *