كاف الشڨاڨ .. بقلم ٱمنة الجبالي

660
تونس ريفيو.. للمواطن صورة وصوت وقلم ||

كاف الشڨاڨ بلاصة تابعة ماطر .. بلاصة هي عبارة على مجموع مغاور و ارتفاعات .. هي بلاصة في لحظة ماللحظات تحس روحك في بلاد اخرى في عالم اخر حجر خارج منو شجر و الصخور اذوكم فالشتاء الماء يهبط فيهم يولي كيما الشلال.. البلاصةعبارة على لا حياة تنبت فيها حياة .. البلاصة مهيش ساهلة .. اما بلاصة تمثل الحياة و بشدة فيها طلوع و برشا هبوط اما بعد التعب اذاكا الكل توصل لفوق و تراااا منظر تاقف فيه الدنيا الكل و تعرف اللي احسن خدمة في العالم هي انك تكون راعي غنم في جبل تقوم الصباح تشوف الجنة تتنفس هواء نظيف تستمتع بالسكون و السلام..مقر خدمتك يطل على لوحة رسمها ربي سبحانو تشوف تزاوج الازرق و الاخضر ألوان الحياة و انعكاسات الضو على الارض و الظل اللي يترسم كي تتعدى الغيمة . تكتشف اللي كنت ترى فيها عالمك هي حاجات صغيرة متتشافش من فوق .. تفهم اللي احنا عاطيين قيمة لحاجات مهيش جوهر الحياة … القمة تمثل الهدف متاعك و تشعبيطك و طلوعك و هبوطك النفس اللي تبدى تتلقف فيه و سقيك اللي ترعش و قلبك اللي باش ياقف و اكا الصوت اللي يقلك سايي مكش باش توصل أذوكم بالظبط المشاكل و التعطيلات و الجهد اللي تعطيه باش توصل .. كي توصل للقمة تعرف حلاوة التعب .. كي توصل للقمة تعرف اللي وين فما ناس الكل بلاصة عادية متخليكش تشوف حلاوة العيشة و اللي المناظر المزيانة ديما مش بالساهل توصللها .. محلاه اكا الاحساس متع كي تشد فرشك بعد اكا تعب و تتفكر اش طلعت و كيفاه وصلت و تقول بلحق عندي قوة منعرفش اللي كانت عندي .. تقول كيما تعديت اكا الهفهوف و اكا الحجر نجم نتعدى حاجات نراها صعيبة .. الطبيعة اكبر مدرسة لينا غادي جدودنا عاشوا و احنا في كل محنة نحنولها . الطبيعة تقويلك عزيمتك و تمتص غشك .. تعلمك انك مترخش يا تتشعبط يا ما توصلش . القمة بعيدة اما تنجم توصللها .. ٱمن بروحك توكل على ربي و اتشعبط.


ٱمنة الجبالي




اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *